اغلى انسانة

ياتاج راسي ونون العين لباكي=لبيه يا أعز وأغلى من يناديني
لبيه يامن بكوني ما أحدن سواكي=لبيه يا أغلا الخلايق يانظر عيني
أمي عسى الله يوخر يوم فرقاكي=ياعل يفداك عمري وباقي سنيني
مادام جنة عدن من تحت ماطاكي=ابيع لجلك أنا ناسن كثيريني
يامن سهرتي ولذيذ النوم ماجاكي=كله لجل راحتي ورضاي تشقيني
يامن تعبتي عشاني وأنتثر ماكي=ولا مسني سوء بعد الله تداريني
واليوم دارك بعيدة مير طرياكي=طيفك بدمي ومجراه الشراييني
لوأن معزتك تشرب نذر مأرواكي=وغلاك ما أوصفه لو بكتب دواويني
يالله عسى ماكتبته يكسب رضاكي=ولرضاك ابدعي عسى ربي يقديني
وحمود يا أغلى انسانه روحه فداكي=ياتاج راسي ويا أغلى من سكن عيني

حفل تخرج ابناء سبيع

بديت بسم الله جلى شانه
الي خلق خلقه مدير اكوانه
بعده سلام الله على من هو حضر
في حفلة جنود الوطن فرسانه
من رنية الفيحا ووادي الخرمة
لين الحفر ورماح مع شعبانه
سبيع فرحانة بمجد ابنائها
والكل منهم بهمه الله عانه
ثلاثة سنين ولفى يوم الحصاد
فرج نفوسن للعلى شقيانة
ماخابت الهقوة بمن فيكم هقا
ولاحزتوا الا الطيب ياخلانه
ماجيت ابارك لأي واحد منكم
لو الردى ماله معاكم خانة
انا ببارك للوطن يا ابناء الوطن
على انضمام حماته وعقبانه
ياموطني مبروك جوك احفاد من
في وحدتك انفوسهم طربانه
ياموطني مبروك جوك ابناء سبيع
لحما حدودك كبودهم عطشانه
ماهابوا اهوال البحر وجزره ومد
كل همهم يضفي ثراك امانه
ياموطني أقسم مايحتاج القسم
واقسم بأن مافيهم الخوانة
ياموطني حنى العهد حاضر وماض
ارجع وتلقى ادلة وبرهانه
منهم رجال موحدك ياموطني؟
سبعان هم تاج الفخر سيسانه 
سبعان من ماض الزمن تاريخهم
كعام من هو زايد طغيانه
لا من لفاهم مغترب لقى السعد
دله بجيرتهم ونسي اخوانه
وضيوفهم بماض تلقى ثلاث
من غيرهم زود بها ضيفانه
مكرمين ضيوفهم من كل صوب
وسيوفهم بدم العدا رويانه
ومنهم اهل العشر الركاب الردف
جاهم نذير الموت يافرسانه
وصدوا جموع مايعدد كثرها
لين انكست جمع العدا خسرانه
خيالة العرفا سبيع الغلبا
فزعة موحد هالوطن واعوانه
مشو معه ماهابهم كثر العدى
الين وحدها ورجح ميزانه
واليوم في نعمة وننعم بالآمان
في ظل أبو متعب سعد عربانه
محبتٍ في قلوب شعبه حازها
ملك وربي رافع له شانه
ولي عهده نائف الامن المهاب
رجل السياسة ملجم عدوانه
قاد الآمن واعانه الله واقتدر
الله يرده سالم لأوطانه
ودفاعنا يبكي على فقيدته
سلطان راح وقادنا سلمانه
سلمان بن عبدالعزيز شبيه ابوه
علمنا كيف الاخ يافي اخوانه
والله يديم الامن فا ارجاء البلد
ويكفينا شر الزمرة الطمعانه
من حولنا عم الربيع اليعربي
وثورة شعوب فجرت بركانه
هم مادروا ان الربيع يعمنا
من عهد جدي ماضيات ازمانه
منهج بلدنا سنة محمد فقط
ودستورنا القرآن هو عنوانه
تمت وصلى الله على سيد البشر
واله واهله وصحبه وصدقانه

عيد ميلادك

ياريم بعيد ميلادك يا قلبي جيت بأهنيك 
وأزف أحلى التهاني يا عساه يعود ١٠٠ عام 
وأشارك بالفرح وأدعي ياربي لي أنا يخليك
ياريم وحق من أنزل آيات النور و الأنعام
بأن حمود حبك يعشقك يهيم في عينيك
يذوبك يحترق ويغار ويعزف في حلاك أنغام               
أبيك لقلبي لحالي أبقهر من حكولي فيك
ولو حتى حكو ما أصدق الواشي ولا النمام
ياريم إن غاب طيفك يوم عني زارني تشكيك
أشك أنه  جرالك شي في غيابك وأنا ما ألام
ختام رسالتي شيء بأقوله ياعسى يزهيك
تعالي بأهمسه  فأذنك ولو هو سبب أستفهام
قصايد كل منهو معجب بغيرك ترى تسليك
لأن كل ما أنكتب في حق غيرك يعتبر إجرام
ياحاكم مملكة بنات هالعالم فخر يكفيك
بأن مايوم حاكم عرش هزه مدحة الخدام

وداع صديق

يا أبو محمد ياحصان الأطاليب

مبروك عل أخطاك دايم سديده

عشرين واحد سبتها مرني صعيب

حزين ضايع وسط فرحة عنيده 

فرحة بنقلك للأهل والأقاريب

وبوسط صدري جبال حزن مشيدة

والله ماودي عن عيوني تغيب

لكن ربك يفعل إلي يريده

مأنت بفقيدة والذي يعلم الغيب 

يامالك(ن) كل الصفات الحميده

إلا عمود البيت وغيرك أطانيب

والطنب لامن ضاع قالوا فقيده

أما عمود البيت لاطاح يالشيب

يطيح معه البيت ويصبح هميده

لصاحبك تفزع فزعة الزير لكليب

وتاقف معه ولاهي عليكم جديده

ولأعداك موت مثل حامي اللواهيب

تبطش بيمنا فاللوازم حديده 

يالنادر الظرغام يالقرم يالذيب

ياتاج رأس المجد يا سيد سيده

أخوي لو إنك من أقصى ألأجانيب

صحبة مراجل والصداقة شديده

وياصاحبي لونك عن العين بتغيب

وبتروح عنا يم دار بعيده

ماتنقص عهود الغلا والمواجيب

وعلاقة بالعز دايم وطيدة

وما أنت بفقيده ياعطيب المضاريب

إلا حرام(ن) بأنك أكبر فقيده

2-10-1429 هـ

ثانـي عيـاد الفطـر تسعـة وعشـريـن=والنـاس فــي زحـمـة تـبـادل تهـانـي 

جاني اتصال يحمل اسوى المضامين=حـكـم بـــلا رحـمــة ولا بـــه تـفـانـي 

حكـم غــراب البـيـن فـرقـى حبيبـيـن=إلـــى الأبـــد مـنــه تـزلــزل كـيـانــي 

وفي داخلـي حسيـت مثـل البراكيـن=مـع صيحـة بالجـوف وسـط المحانـي 

وشريان قلبـي فيـه مثـل السكاكيـن=وغـصـة حــزن منـهـا تبـلـم لـسـانـي 

ارجـوك كفـي دمـعـك الـيـوم ياعـيـن=كـفـيـه دامـــه فـاضـحـك بـالـعـلانـي 

لــو البـكـى ياعـيـن يـرجــع عـزيـزيـن=لأبكـي اليـن يـعـود مــن كــان فـانـي 

لكـن تـرى مايفيـد لـو هـو بعـد حـيـن=يكفـي ثـلاث سنـيـن دمـعـي بـلانـي 

ثالث سنـة مـرة علـى فراقنـا الشيـن=ولا هـو بكيفـي يــوم خـلـي جفـانـي 

ثالـث سنـة وحبـه بقلبـي لهـا الحيـن=كـنـه بـحــر مـالــه حـــدود ومـوانــي 

والحيـن راح وصــار ضـمـن المقفـيـن=غـيَــب ولـلـذكـرى تـركـنـي اعــانــي 

وشـريـط ذكــرى حبـنـا والمضـامـيـن=ايـام حلـوة تحمـل اسمـى المعـانـي 

وش فايـد الذكـرى لـمـاض المحبـيـن=دامـه رحـل واقـفـى وفــات الاوانــي 

سبايب غيابي

لا تسألونـي عــن سبـايـب غيـابـي 
ولا احد يقـول حمـود ماهـو بموجـود 


لا والله الا حـــان مـوتــي وعـذابــي 
يوم انهـا راحت عـن العيـن ياسعـود 


قـفـت وخلـتـنـي ولا أحـــد درابـــي 
وخلـت دموعـي دم بعيونـي السـود 


قالـت قبـل ماتـروح يـا حمـود مابـي 
تنسى وتسلى عني بيوم يا حمـود 


ياحمـود حضـي بيـد غـيـرك رمـابـي 
وزمانـي اسقانـي مـن المـر قرهـود 


ياحمـود انـا احـبـك وحـبـك طغـابـي 
حبـك بقلبـي دايــم الــدوم مـمـدود 


لحضـة هـدؤ عمـت وتنـطـر جـوابـي 
جاوبـت أنـا بسكـات مجبـر ومحـدود 


وراحت بعدها صحت من حـر مابـي 
انعـى زمانـن كـلـه اوعــود واجـحـود 


اصيح با اعلـى صـوت يامـن غدابـي 
اسمع كلامي يمدي لهجـر وصـدود 


انـــا احـبــك لا تـزيــد الـعـنــا بــــي 
حبـك تمـكـن داخــل القـلـب ويــزود 


قـصـة انــا بنـسـاك لا يــا ياشبـابـي 
الا اذا انـي صـرت فـي ظلمـة لحـود 


ثـم وقتـهـا تـعـرف سبـايـب غيـابـي 
ويحـق قـول حمـود مـاهـو بمـوجـود 


وتعرف سبايـب موتتـي مـع عذابـي 
بأسباب من قفت عن العين ياسعود 

اذا قصدك

اذا تسأل عن اسباب الكئابه
وليه حمود ما عنده رحابه
وعن دمع حدر من موق عيني
وعن  قلبي وش أسباب الشقابه
أذا ياصاحبي تبغى الوكايد
على أسئلتك أخذ مني الإجابه
أنا ضايق وحزني محتويني
وأشوف الكون في عيني ذبابه
سبايب من ملك قلبي وروحي
وملك فكري وأخذ عقلي وغدابه 
اليى من قلت أحبك صد عني
وأخذ عقلي وقفى به نهابه
علامه صار ضدي ليه مدري
بعد ماكان عنوان الوفا به
إذا قصده عذاب القلب يكفي
ترفق ياعنا القلب وعذابه
وإذا قصده يذل حمود ياخي
صحيح الحب إهانة لاغرابه
وإذا عملته هذي يختبرني
أمانه وصلوني لحد بابه
 كلام عندي ونفسي  أقوله
عساه يحن لي ويعلن أيابه
أنا بسأل عن أشياء كثيرة
 وأبي منك تجهز للإجابه
أبيك تشوف جرح وسط جوفي  
 تمكن داخلي وأحكم صوابه
ابسأل عن سبب هالجرح  منهو؟
عساه يداوي جرحي وألتهابه
وعن عينٍ سهرها صار عادة؟
ودمعة حزن من ضاق الملا به
اذا كانك تبين البعد لحضة
انا احبك واحبك دون ما آبه
ابيع الروح دونك واشتريها
وازعل ناسي لجلك والقرابة
واذا هم لحقوني ربع شرهه
كلامٍ لسان غيرك وش نبا به
ياريم إن كان حبك من عيوبي
هلابه زود من قلبي هلابه
 وإذا ياريم بتزيدي صدودك
عسى عمري يعجل في غيابه

سلوم وعوايد

جتني ومن شفتها ضاقت علي السبول
فيها انكسار وخضوع وحزن ماله مثيل


سالتها بعد صمت  سادني مع فضول
وش فيك قولي علامه صار جسمك نحيل


كنت أنطر شفاتها عل وعساها تقول
تشكي من أحد مزعلها ومن ذالقبيل


لحضة أفقت ونضرت لعينها في ذهول
محبوب قلبي علام دموع عينه تسيل


وفي عيونها  حلمنا  شفته بسرعة يزول
وعرفت من عينها  معنى قرار الرحيل


ضميتها وداخلي حسرة تصول وتجول
ثم صحت فيها أحبك وعاجز إني أشيل


هم الغياب المفاجي والسهر فالليول
فرقاك نار لها في وسط كبدي مقيل


قالت ترى غيركم ماله بقلبي قبول
لو إغصبوني عليه أنا لغيرك ما أميل


مادام هم وافقوا  ما تجهل أنت الأصول
الرأي لرجالنا ما للمره ربع قيل


هذه سلوم وعوايد قبل عهد الرسول
أنا غصبوني وغيرك مانجرب بديل


ياحمود دنياي دونك مظلمة في نزول
لاا تنتهي عند ريم روح دور سبيل


ثم صحت ياريم غيرك تسلية بالعقول
وقلبي لك أنتي فقط ولا ندور زميل


وقبل نسافر ونخضع للزمن دون حول
وقبل أختم سطور قلب  يشتكي بهمس ليل


ياريم أحبك أحبك يالمها يالخجول
ياريم غيرك تمنى يكون بعدك بديل


وياريم في فراقكم ماذا عسانا نقول
الله حسيبي ع الفرقى ونعم الوكيل

انتهينا

صبرنا لين ضاق الصبر فينا //تحملنا شقى الحب وكتمنا..


الين الارض ضاقت في حدينا//وكشَف سود النوايا لو نكرنا..


تجملنا وضاع الي بنينا//وضيعنا بعض في معركتنا..


وكابرنا وتقمّصنا الحنينا //وصدّقنا بعض في ما كذبنا..


ومتاهات الدروب الي مشينا//لنهاية دربنا معها خذنا..


ورمتنا في بحورٍٍ تحترينا//سبحنا وقدّر الله ماغرقنا..


حذفنا الموج في غبر السنينا//على شاطي الحزن عشنا قصصنا..


ومع ذلك تناسينا ونسينا//نكابر ما اعترفنا بمشكلتنا..


وعدنا للدروب الي بدينا//وشلنا احلامنا معنا وسلكنا..


ونفس الي شكينا واشتكينا//حملنا ولانفعتنا تجربتنا..


ولكن منهو الغلطان فينا//او انّ كلنا فيها اشتركنا..


رسمنا خططنا حنا الثنينا//واثارينا نخطط في فشلنا..


فتحنا قلوبنا لآبناء اللذينا//واثارينا لعواذلنا سمحنا..


وصدقنا نوايا العاذلينا//وكذبنا بعضنا وافترقنا..


حصدنا مازرعناه وجنينا//,فات الفوت لو أنّ ندمنا..


كلينا ماطبخنا من يدينا//ولو الي طبخنا ماعجبنا..


مشاعرنا كبتناها وسلينا//وكذبنا واستمرينا بغلطنا..


اثنين في مرحنا غافلينا//وبعد فات القطار احنا اتفقنا..


نبي نبني وهدمنا الي بنينا//وحلمنا بالصعاب ولاوصلنا


مادام انّ طمحنا ولا رقينا //ومادام ان كل مانرقى انتكسنا 


نودع بعضنا بعد انتهينا//ونغلق قصةٍ منها تعبنا..


وداعاً ريم بشعور الحزينا //مادام ان المفارق غصب عنّا..